Пракуратура папярэдзіла глускіх міліцыянтаў за "адкатванне пальчыкаў" 

Міліцыянты Магілёўшчыны здымаюць адбіткі пальцаў у мужчын, спасылаючыся нібыта на дэкрэт прэзідэнта. Пракуратура вынесла за незаконную працэдуру папярэджанне Глускаму РАУС.

На Магілёўскім заводзе штучнага валакна праз аддзел кадраў людзей брыгадамі выклікаюць у міліцыю, каб узяць адбіткі пальцаў і ўзор ДНК. Пра гэта Еўрарадыё распавёў Аляксандр Каралёў, юрыст Незалежнага прафсаюза:

Аляксандр Каралёў: Звярталіся сябры прафсаюза: ў іх брыгадзе і іншых брыгадах выклікаюць у аддзел кадраў і праз яго патрабуюць, каб яны прыйшлі да інспектара міліцыі здаць адбіткі пальцаў. Як юрыст, я адказаў, што гэта незаконна.

У міліцыі гэтыя выклікі тлумачаць правядзенням мерапрыемстваў для устанаўлення асобаў, датычных  да выбуха 4 ліпеня ў Мінску. Але Каралёў раіць не пагаджацца здаваць адбіткі пальцаў. Бо паводле закону адбіткі пальцаў можна браць толькі ў асобаў, якіх падазраюць у выбуху, і на гэта павінны быць афіцыйныя паперы.

У Глуску людзей выклікалі позвай у ваенкамат для ўдакладнення звестак. А там ужо супрацоўнікі міліцыі здымалі адбіткі пальцаў. Ігар Кірын, які адмовіўся ад гэтай працэдуры, распавёў Еўрарадыё, што міліцыянты прыкрываюць гэта нейкім невядомы дэкрэтам прэзідэнта:

Ігар Кірын: Мяне прыняў намеснік начальніка Дрозд. І пачаў упэўніваць, што нядаўна прыняты новыя дэкрэт. У адпаведнасці з ім усе ваеннаабавязаныя павінны прайсці дактыласкапічную экспертызу, а райаддзел дапамагае ваенкамату выканаць дэкрэт.

Калі Кірын папрасіў паказаць дэкрэт, яму адказалі, што не маюць яго і не бачаць нічога кепскага ў тым, каб зняць адбіткі пальцаў, бо гэта дапаможа знайсці вінаватага ў выбуху. На скаргу Кірына пракуратура адказала, што гэтая працэдура павінна быць добраахвотнай і вынесла папярэджанне кіраўніцтву РАУС Глуска.

Фота — "Школа жизни"

2008-11-12 19:23:14, Юрась Вітальеў, Магілёў

ЕЎРАПЕЙСКАЕ РАДЫЁ ДЛЯ БЕЛАРУСІ